Our website is made possible by displaying online advertisements to our visitors. Please consider supporting us by whitelisting our website.
سامانِ بخشش Mufti Azam Hind Muhammad Mustafa Raza مفتی اعظم ھند محمد مصطفیٰ رضاشاعری

کوئی کیا جانے جو تم ہو خدا ہی جانے کیا تم ہو خدا تو کہہ نہیں سکتے مگر شانِ خدا تم ہو

کوئی کیا جانے جو تم ہو خدا ہی جانے کیا تم ہو
خدا تو کہہ نہیں سکتے مگر شانِ خدا تم ہو
نبیوں میں ہو تم ایسے نبی الانبیا تم ہو
حسینوں میں تم ایسے ہو کہ محبوبِ خدا تم ہو
تمہارا حسن ایسا ہے کہ محبوبِ خدا تم ہو
مہِ کامل کرے کسبِ ضیا وہ مہ لقا تم ہو
علو مرتبت پیارے تمہارا سب پہ روشن ہے
مکینِ لامکاں تم ہو شہِ عرشِ علا تم ہو
تمہاری حمد فرمائی خدا نے اپنے قرآں میں
محمد اور مُمَجَّد مصطفیٰ و مجتبیٰ تم ہو
جو سب سے پچھلا ہو پھر اس کا پچھلا ہو نہیں سکتا
کہ وہ پچھلا نہیں اَگلا ہوا اس سے وَرا تم ہو
تمہیں سے فتح فرمائی تمہیں پر ختم فرمائی
رُسل کی ابتدا تم ہو نبی کی اِنتہا تم ہو

خدا نے ذات کا اپنی تمہیں مَظہَر بنایا ہے
جو حق کو دیکھنا چاہیں تو اُس کے آئینہ تم ہو
تمہیں باطن تمہیں ظاہر تمہیں اوَّل تمہیں آخر
نہاں بھی ہو عیاں بھی مبتدا و مُنْتَہا تم ہو
منوّر کردیا ہے آپ کے جلوؤں نے عالم کو
مہ و خورشید کو بخشی ضیا نورِ خدا تم ہو
مٹادی کفر کی ظلمت تمہارے رُوئے روشن نے
سویرا شرک کا تم نے کیا شمس الضحیٰ تم ہو
جہاں تاریک تھا سارا اندھیرا ہی اندھیرا تھا
تم آئے ظلمتیں تم سے مٹیں بدرُ الدُّجیٰ تم ہو
مِرا منہ کیا کہ میں مدح و ستائش میں زباں کھولوں
مِرے آقا تم ایسے ہو کہ ممدوحِ خدا تم ہو(1)

رَفَعْنَا سے تمہاری رِفعت بالا ہوئی ظاہر
کہ محبوبانِ رب میں سب سے عالی مرتبہ تم ہو
علو رُتبۂ سرکارِ عالی سب پہ روشن ہے
مکینِ لامکاں تم ہو شہِ عرشِ عُلا تم ہو
شبِ معراج سے اے سیدِ کل ہوگیا ظاہر
رُسل ہیں مقتدی سارے اِمام الانبیا تم ہو
نہ ہوتے تم نہ ہوتے وہ کہ اصلِ جملہ تم ہی ہو
خبر تھے وہ تمہاری میرے مولیٰ مبتدا تم ہو
تمہارے چاہنے والے کو کچھ ایسی محبت ہے
ادھر ہوجائے وہ مولیٰ جدھر صدرُ الوریٰ تم ہو
تمہارے چاہنے والے اسے محبوب ہیں سارے
کچھ اس انداز کے پیارے حبیبِ کبریا تم ہو
تمہارے بعد پیدا ہو نبی کوئی نہیں ممکن
نبوت ختم ہے تم پر کہ ختم الانبیاء تم ہو

یہ کیا میں نے کیا کیوں ڈھونڈ ڈالا عرصۂ محشر
ہمیں معلوم تھا پیارے ہمارا مدعا تم ہو
مگر ایسا نہ کیوں ہوتا کہ محشر میں یہ کھلنا تھا
شفیعِ مُجرِماں پیشِ خدا تنہا شہا تم ہو
گرفتارِ بلا حاضر ہوئے ہیں ٹوٹے دل لے کر
کہ ہر بے کل کی کل ٹوٹے دلوں کا آسرا تم ہو
خبر لیجے خدارا میرے مولیٰ مجھ سے بے کس کی
کہ ہر بے کس کے کس بے بس کے بس روحی فدا تم ہو
مُسَلَّط کردیا تم کو خدا نے اپنے غیبوں پر
نبی مجتبیٰ تم ہو رسولِ مرتضیٰ تم ہو
چمک جائے دلِ نوریؔ تمہارے پاک جلوؤں سے
مٹادو ظلمتیں دِل کی مرے نورُالہدیٰ تم ہو

Related Articles

Back to top button
error: Content is protected !!