سورۂ ملک کی اہمیت وفضیلت

سورۂ ملک قرآن مجید کی سرسٹھویں سورت ہے۔ اس سورت کی اہمیت کا اندازہ اس سے لگائیے کہ تاجدارِ کائنات صلی اللہ  علیہ وآلہ وسلم نے اس کی بابت ارشاد فرمایا: ’میں چاہتا ہوں کہ یہ سورت ہر مومن کے دل میں ہو‘۔(معجم کبیر طبرانی:۱۱۴۵۱)

حدیث:’قرآن مجید کے اندر تیس آیات پر مشتمل ایک سورت ہے، جو کل قیامت کے دن اپنے پڑھنے والی کی اس وقت تک شفاعت کرتی رہے گی، جب تک وہ پورا بخش نہ دیا جائے۔یہ سورت ’تبارک الذی بیدہ الملک‘ہے۔(سنن ابوداؤد:۱۴۰۰) 

حدیث: ایک دوسری حدیث میں یوں آیا ہے کہ ’قرآن میں ایک سورت ہے، جس کی آیتوں کی تعداد تیس ہے،یہ اپنے پڑھنے والے کی طرف سے جھگڑتی رہے گی،یہاں تک کہ اسے جنت میں جانے کا پروانہ مل جائے گا‘۔یہ سورت کوئی اور نہیں ’سورۂ ملک‘ہے۔ (معجم صغیر طبرانی: ۴۹۰ ۔۔۔ شعب الایمان:۲۲۷۸)

حدیث: سورۂ ملک حفاظت کرنے والی، نجات دینے والی اور قبر کے عذاب سے بچانے والی سورت ہے۔(مصنف عبدالرزاق:۶۰۲۵۔۔۔مستدرک حاکم:۳۸۳۹)

حدیث:  حضرت  عبداللہ بن عباس رضی اللہ تعالیٰ عنہما نے ایک شخص سے کہا: آ میں تجھے ایک ایسا تحفہ دوں کہ تو خوش ہوجائے، تبارک الذی الخ پڑھا کر اور اسے اپنے اہل وعیال کو اولاد کو، گھر کے بچوں کو اور پڑوسیوں کو سکھا، یہ سورت نجات دلانے اور شفاعت کرنے والی ہے۔ قیامت کے دن اپنے پڑھنے والے کی طرف سے اللہ سے سفارش کرے گی اور اسے عذاب دوزخ سے بچالے گی اورعذاب قبر سے بھی۔(مسندعبدبن حمید:۶۰۳)