سورۂ جمعہ کی اہمیت وفضیلت

سورۂ جمعہ قرآن پاک کی باسٹھویں سورت ہے۔ یہ مفصل سورتوں میں سے ایک ہے، جس کے بارے میں تاجدارِ کائنات صلی اللہ  علیہ وآلہ وسلم نے فرمایا: مجھے مفصَّلات کے ذریعہ جملہ آسمانی کتابوں اور پیغمبران عظام پر فضیلت بخشی گئی ہے۔ 

حدیث:   حضرت واصلہ بن اسقع رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے فرمایا: مجھے مفصلات کے ذریعہ عزت وفضیلت دی گئی ہے۔(شعب الایمان بیہقی: ۲۲۵۷۔۔۔معجم طبرانی: ۱۶۹۱۷)

   اِسلام کے  اندر جمعہ کے دن کو بھی بڑی اہمیت اور فضیلت وعظمت حاصل ہے۔ 

حدیث: میں آتا ہے کہ تمھارے دنوں میں سب سے افضل جمعہ کا دن ہے۔ اسی دن آدم علیہ السلام پیدا ہوئے، اسی دن وفات ہوئی، اسی دن صور پھونکا جائے گا، مجھ پر کثرت سے درود پڑھا کرو،کیوں کہ اس دن کثرت سے ملائکہ حاضر ہوتے ہیں اور جب بھی کوئی مجھ پر درود پڑھتا ہے تو اس کے فارغ ہونے سے پہلے وہ درود مجھ پر پیش کیاجاتا ہے۔ عرض کیاگیا، کیا آپ کے وصال کے بعد بھی؟ فرمایا: اللہ تعالیٰ نے زمین پر انبیا کے جسموں کو حرام کردیا ہے، پس اللہ کا نبی (اپنے مزار میں) زندہ ہے، اسے رزق دیاجاتا ہے۔(سنن ابن ماجہ:۱۶۳۷)

حدیث:  میں آیاکہ جو شخص جمعہ کے دن غسل کرے، مسواک کرے، اگر اس کے پاس خوشبو ہوتو وہ لگائے اور اچھا لباس پہنے، پھر گھر سے نکل کر مسجد کی طرف آئے، پھر لوگوں کی گردنوں کو پھاندتا ہوا آگے نہ جائے، پھر اللہ کی توفیق سے نفل پڑھتارہے اور جب امام خطبہ دینے کے لیے آئے تو خاموشی سے بیٹھ جائے تو اس کا یہ عمل کفارہ بن جائے گا ان کوتاہیوں اور غفلتوں کا جو گزشتہ جمعہ سے اس جمعہ تک اس سے سرزد ہوئی ہیں۔(صحیح بخاری:۹۱۰۔۔۔سنن ابن ماجہ:۱۰۹۷)