جہنم کی آگ دُنیاکی آگ سے ستر گناتیزہے :
حضرتِ سیِّدُنا ابنِ مسعود رضی اللہ تعالیٰ عنہ سے مروی ہے، حضور نبئ مُکَرَّم،نُورِ مُجسَّم، رسولِ اَکرم، شہنشاہ ِبنی آدم صلَّی اللہ تعالیٰ علیہ وآلہ وسلَّم کا فرمانِ عبرت نشا ن ہے:” دُنیاکی آگ جہنم کی آگ سے ستر درجے کم ہے اوراگر اس کودومرتبہ سمندر میں نہ ڈالا گیا ہوتا تو تم اس سے کچھ بھی نفع نہ اُٹھا سکتے۔ـــ”
(سنن ابن ماجۃ، ابواب الزھد، باب صفۃ النار، الحدیث۴۳۱۸، ص۲۷۴0، بتغیرٍ قلیلٍ)
جہنم کی ستر ہزار لگامیں ہوں گی:
حضرتِ سیِّدُنا عبد اللہ بن عمررضی اللہ تعالیٰ عنہ سے مروی ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحروبَر صلَّی اللہ تعالیٰ علیہ وآلہ وسلَّم کا فرمانِ غیب نشان ہے: ”قیامت کے دن جہنم کو لایا جائے گا،اس کی ستر ہزار لگامیں ہوں گی، ہر لگام کے ساتھ ستر ہزارفرشتے ہوں گے جو اس کو کھینچ رہے ہوں گے ۔” (صحیح مسلم،کتاب الجنۃ، باب جھنم اعا ذنا اللہ منھا، الحدیث۲۸۴۲، ص۱۱۷۱)
