Our website is made possible by displaying online advertisements to our visitors. Please consider supporting us by whitelisting our website.
islam

حمد باری تعالی اللہُ اللہُ اللہُ اللہُ

پوچھا گل سے یہ میں نے کہ اے خوبرو
تجھ میں آئی کہاں سے نزاکت کی خو
یاد میں کس کی ہنستا مہکتا ہے تو
ہنس کے بولا کہ اے طالب رنگ وبو
اللہُ    اللہُ    اللہُ    اللہُ
عرض کی میں نے سنبل سے اے مشکبو
صبح کو کرکے شبنم سے تازہ وضو
جھوم کر کون سا ذکر کرتاہے تو
سن کے کرنے لگا دم بدم ذکر ہُو
اللہُ    اللہُ    اللہُ    اللہُ
جب کہا میں نے بلبل سے اے خوش گلو
کیوں چمن میں چہکتاہے تو چارسُو
دیکھ کر گل کسے یاد کرتا ہے تو
وجد میں بول اٹھا وحدہ وحدہ
اللہُ    اللہُ    اللہُ    اللہُ
جب پپیہے سے پوچھاکہ اے نیم جاں
یاد میں کس کی کہتا ہے تو پی کہاں
کون ہے پی ترا کیاہے نام و نشاں
بول اٹھا بس وہی جس پہ شیداہے تو
اللہُ    اللہُ    اللہُ    اللہُ
میں نے قمری سے کی جا کے یہ گفتگو
گاتی رہتی ہے کوکو توکیوں کوبکو
ڈھونڈتی ہے کسے کس کی ہے آرزو
بولی سن میرا نغمہ ہے حق سرّہ
اللہُ    اللہُ    اللہُ    اللہُ
آکے جگنو جو چمکا مرے روبرو
عرض کی میں نے اے شاہدشعلہ رو
کس کی طلعت ہے تو کس کا جلوہ ہے تو
یہ کہا جس کا جلوہ ہے ہر چار سو
اللہُ    اللہُ    اللہُ    اللہُ
میں نے پوچھا یہ پروانے سے دوبدو
کس ليے شمع کی لو پہ جلتا ہے تو
شعلہ نار میں ہے کس کی جستجو
جلتے جلتے کہا اس نے یانورہ
اللہُ    اللہُ    اللہُ    اللہُ
اعظمی گرچہ بے حد گنہ گار ہے
مجرم و بے عمل ہے خطا کار ہے
حق تعالی مگر ایسا غفار ہے
اس کی رحمت کا نعرہ ہے لاتقنطوا
اللہُ    اللہُ    اللہُ    اللہُ

Related Articles

Back to top button
error: Content is protected !!