سورۂ رحمٰن کی اہمیت وفضیلت

سورۂ رحمٰن  قرآن مجید کی پچپنویں سورت ہے۔یہ سورت اللہ کے اَسماے حسنیٰ میں  سے ایک خوبصورت نام ’الرحمٰن‘ سے معنون ومنسوب ہے۔ یہ سورت ہمیں اللہ کی نعمتوں کو برابر یاد رکھنے کی تاکید اور اس سے کبھی غفلت نہ برتنے کی تنبیہ کرتی ہے۔ اس سورت میں کئی بار پروردگار نے ’پھربھلا تم اپنے رب کی کون کون سی نعمتوں کو جھٹلاؤگے!‘کے ذریعہ ہمیں اپنی نعمتیں یاد دلائی ہیں۔ خدا کرے کہ ہماری زندگی کا لمحہ لمحہ اس کریم پروردگار کی شکرگزاری اور طاعت وبندگی میں گزرے۔

حدیث:حضرت جابر سے مروی کہ ایک روز  حضور اکرم صلی اللہ علیہ وآلہ وسلم  صحابہ کرام کے سامنے تشریف لائے اور سورۂ رحمٰن کی اول سے آخر تک تلاوت فرمائی۔ صحابہ کرام چپ چاپ سنتے رہے۔ اس پر رسولِ کائنات علیہ الصلوٰۃ والسلام نے فرمایا: تم سے جنّات ہی جواب دینے میں اچھے رہے کہ  میں نے جب اُن کے سامنے اس کی تلاوت کی تو میں جب کبھیفَبِاَیِّ اٰلَآءِ رَبِّكُمَا تُكَذِّبٰنِ پڑھتا تو وہ کہتے: لا بشیٔ من نِعَم ربنا نکذب فلک الحمدیعنی اے پروردگار! ہم تیری نعمتوں میں سے کسی نعمت کو نہیں جھٹلاتے، اور تیرے ہی لیے ساری تعریفیں ہیں۔(سنن ترمذی:۳۲۹۱۔۔۔مشکوٰۃ المصابیح:۸۶۱)

یہ سورت حسن عبارت اور حسن طرز کے لحاظ سے قرٓآن پاک کی زینت ہے۔ اس سورت کی تلاوت میں ایسا اَثر ہے کہ سننے والے پر بے حد خاموشی اور رقت طاری ہوجاتی ہے۔ تفسیر ابن کثیر میں لکھاہے کہ یہ سورت اپنے حسن عبارت اور عمدہ طرزِ اَدا میں دلہن کی طرح آراستہ وپیراستہ اور مزین  ہے۔

حدیث:اسی لیے حدیث شریف میں فرمایا گیا ہے کہ ’ہر چیز کے لیے ایک زینت ہوتی ہے اور قرآن کی زینت سورۂ رحمن ہے‘۔(شعب الایمان بیہقی: ۲۲۶۵۔۔۔مشکوٰۃ المصابیح:۲۱۸۰۔۔۔ تفسیر درمنثور، سیوطی:۷؍۶۹۰)